३०. म मौन छु केवल, अचेत होइन

 

म मौन छु

प्रश्नहरू नभएका होइनन् 

जिज्ञासाहरु नउब्जेका होइनन् 

 

आवाज छ

बन्दुकको गोलीझै प्रश्न सोध्न सक्छु 

घाउको मलम्झै उत्तर दिन सक्छु

 

दृष्टि छ 

डाँडा पारिको सुन्दर दृश्य देख्न सक्छु

अन्धकारमा भएकालाई उज्यालो तर्फ डोर्याउन सक्छु

 

सामर्थ्य छ 

बदलिँदो समाज एकताको डोरीले हाक्न सक्छु

मानव मानव वीचको दूरी विचारले जोड्न सक्छु

 

तर पनि म मौन छु

यँहा सच्चिने भन्दा बढी बिक्ने धेरै छन्

नबुझ्ने भन्दा बढी नबुझे झैँ गर्ने धेरै छन् 

 

यसैले म मौन छु

परिवर्तन खोज्ने भन्दा यथास्थितिमा रमाउने धेरै छन् 

कारण अकारण दबिएका आवाज धेरै छन् 

 

मेरो मौनता 

मलाई थाहा छ विशाल शक्ति सञ्चय गर्दै छ 

मौनताको विशाल ज्वारभाटा विष्फोटको पर्खाइमा छ 

 

न रोक्नु त्यतिबेला

आगोका मूलहरू फुट्ने छन् हर घर बस्तीबाट 

अवस्था व्यवस्था सब परिवर्तन हुन्छन् हाम्राे एकताबाट

 

म मौन छु केवल, अचेत होइन।

 

२०८२